ខេត្តកំពង់ធំ៖ ឯកឧត្តម នួន ផារ័ត្ន អភិបាលខេត្តកំពង់ធំ និងលោកជំទាវ បានអញ្ជើញជាអធិបតីក្នុងពិធីលែងមេពូជបង្កង ចំនួន ៦ គីឡូក្រាម និងកូនបង្កងចំនួន ៧ ម៉ឺនក្បាល ចូលទៅក្នុងស្ទឹងព្រៃប្រស់ កាលពីព្រឹកថ្ងៃទី២៦ ខែសីហា ឆ្នាំ២០២៥។
ពិធីនេះ ត្រូវបានរៀបចំឡើងក្នុងគោលបំណងលើកកម្ពស់និងបង្កើនធនធានជលផលធម្មជាតិនៅក្នុងខេត្ត។
ពិធីដ៏មានអត្ថន័យនេះ ក៏មានការអញ្ជើញចូលរួមពីសំណាក់លោក ប៉ែន វណ្ណារិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត ក៏ដូចជាមន្ត្រីរាជការមកពីស្ថាប័ននានាជុំវិញខេត្ត និងបងប្អូនប្រជាពលរដ្ឋយ៉ាងច្រើនកុះករផងដែរ។
ឯកឧត្តមអភិបាលខេត្តបានគូសបញ្ជាក់ពីសារៈសំខាន់នៃការថែរក្សា និងអភិរក្សធនធានជលផល ដើម្បីធានានូវនិរន្តរភាពសម្រាប់មនុស្សជំនាន់ក្រោយ និងដើម្បីទ្រទ្រង់ជីវភាពរស់នៅរបស់ប្រជាពលរដ្ឋដែលពឹងផ្អែកលើវិស័យនេសាទ។ ឯកឧត្តមក៏បានអំពាវនាវដល់ប្រជាពលរដ្ឋទាំងអស់ឲ្យចូលរួមសហការទប់ស្កាត់បទល្មើសនេសាទខុសច្បាប់ ដើម្បីការពារមច្ឆាជាតិឲ្យបានគង់វង្ស។
ការលែងបង្កងនេះ គឺជាសកម្មភាពមួយក្នុងចំណោមសកម្មភាពជាច្រើន ដែលអាជ្ញាធរខេត្តបាននិងកំពុងអនុវត្ត ដើម្បីចូលរួមចំណែកក្នុងការអភិវឌ្ឍវិស័យកសិកម្មនិងជលផល ស្របតាមគោលនយោបាយរបស់រាជរដ្ឋាភិបាល។ ពិធីទាំងមូលប្រព្រឹត្តទៅក្រោមបរិយាកាសរីករាយ និងស្និទ្ធស្នាល៕អត្ថបទលោកប៊ុត ពុទ្ធី