ខេត្តកែប៖ នៅព្រឹកថ្ងៃទី២៨ ខែសីហា ឆ្នាំ២០២៥ ឯកឧត្តមបណ្ឌិត សោម ពិសិដ្ឋ អភិបាលនៃគណ:អភិបាលខេត្ត និងឯកឧត្តម ណុះ ស្លេះ រដ្ឋលេខាធិការក្រសួងអប់រំ យុវជន និងកីឡា និងជាប្រធានគណៈមេប្រយោគទូទាំងប្រទេសប្រចាំខេត្តកែប បានអញ្ជើញបើកវិញ្ញាសារប្រឡងសញ្ញាបត្រមធ្យមសិក្សាទុតិយភូមិ(បាក់ឌុប) នៅសាលាវិទ្យាល័យ ប៉ុនរ៉ានី​ ហ៊ុនសែន ចរិយាវង្ស​ ខេត្តកែប។

ថ្លែងក្នុងឪកាសនោះ ឯកឧត្តមបណ្ឌិត សោម ពិសិដ្ឋ អភិបាលខេត្ត បានផ្តាំផ្ញើដល់បេក្ខជនទាំងពីរភេទ ដែលត្រូវចូលប្រឡងសញ្ញាបត្រមធ្យមសិក្សាទុតិយភូមិនាពេលនេះ ត្រូវតែយកចិត្តទុកដាក់ខ្ពស់ និងខិតខំសរសេរឲ្យល្អត្រឹមត្រូវទៅលើក្រដាសវិញ្ញាសារ មុននិងឆ្លើយត្រូវគិតត្រិះរិះ​ ពិចារណា ឲ្យបានគ្រប់ជ្រុងជ្រោយ និងត្រូវខិតខំប្រឹងប្រែងឲ្យអស់ពីសមត្ថភាព ដោយត្រូវគោរពឲ្យបានខ្ចាប់ខ្ជួននូវបទប្បញ្ញត្តិ និងបទបញ្ញាផ្ទៃក្នុងនៃការប្រឡង និងប្រកាន់យកនូវគោលការណ៍ ( ចេះជាប់)។

សូមជម្រាបថា នៅខេត្តកែប បានជ្រើសរើសទីតាំងប្រឡងនៅសាលាវិទ្យាល័យប៉ុនរ៉ានី​ ហ៊ុន សែន ចរិយាវង្ស ក្នុងនោះមាន មណ្ឌលប្រឡងចំនួន ២ គឺ ទី១ មណ្ឌលវិទ្យាល័យ ប៉ុនរ៉ានី​ ហ៊ុន សែន ចរិយាវង្ស(ខាងជើង) សម្រាប់ ថ្នាក់វិទ្យាសាស្រ្តសង្គម មានអាគាមួយខ្នង ៣ជាន់ ១៨បន្ទប់ ទី២ មណ្ឌលវិទ្យាល័យ ប៉ុនរ៉ានី​ ហ៊ុន សែន ចរិយាវង្ស (ត្បូង) សម្រាប់ថ្នាក់វិទ្យាសាស្រ្ត មានអាគារមួយខ្នង ៤ជាន់ មានចំនួន ២៤បន្ទប់​ មណ្ឌលទាំង២នេះ មានទីតាំងស្ថិតនៅ ភូមិដំណាក់ចំបក់ សង្កាត់អូក្រសារ ក្រុងកែប ខេត្តកែប ។

ដោយសង្កេតឃេីញថា​ បេក្ខជន​ដែលមកចូលរួមប្រឡង​ បានគោរពតាមបទប្បញ្ញត្តិនៃការប្រឡង ដោយគ្មានយកសំណៅឯកសារ និងឧបករណ៍អេឡិចត្រូនិកចូលមណ្ឌលប្រឡងឡើយ។

ដំណើរការប្រឡងសំណេរនាព្រឹកថ្ងៃទី១ មាន២មុខវិជ្ជាគឺ៖ ប្រវត្តិវិទ្យា និងជីវវិទ្យា (សម្រាប់ថ្នាក់វិទ្យាសាស្ត្រ) ផែនដីនិងបរិស្ថានវិទ្យា និងប្រវត្តិវិទ្យា (សម្រាប់ថ្នាក់វិទ្យាសាស្ត្រសង្គម)។ នារសៀលថ្ងៃទី១ មាន២មុខវិជ្ជាគឺ៖ គីមីវិទ្យា និងភាសាបរទេស (ថ្នាក់វិទ្យាសាស្ត្រ) និងភូមិវិទ្យា និងភាសាបរទេស (ថ្នាក់វិទ្យាសាស្ត្រសង្គម)។

ក្នុងនោះ ចំនួនបេក្ខជនប្រឡងថ្នាក់វិទ្យាសស្រ្ត សរុប៦០នាក់ (ស្រី៤១នាក់) ក្នុងនោះបេក្ខជនស្វៃរិនគ្មាននោះទេសម្រាប់ថ្នាក់វិទ្យាសាស្រ្ត ចំពោះបេក្ខជនថ្នាក់វិទ្យាសាស្រ្តសង្គម សរុប២៥៩នាក់ ស្រី ១៤៤ នាក់ បេក្ខជនស្វៃរិន ១២ នាក់ ស្រី ៣នាក់ បេក្ខជនអវត្តមាន គ្មាន បេក្ខជនមានបញ្ហាសុខភាពចំនួន ២នាក់ ស្រី ១នាក់ (ពិការ)៕
អត្ថបទ៖​ លោក​ សេស​ សង់​ មន្ទីរ​ព័ត៌មាន​ខេត្ត​កែប​