កែប៖ ត្រីមេពូជចំនួន៣០គ.ក រួមមានត្រីឆ្ពិន ត្រីអណ្តែង ត្រីក្រាញ់ ជាដើម និងកូនត្រីចម្រុះប្រមាណ៣ម៉ឺនក្បាល ត្រូវបានលែងចូលអាងទឹកទំនប់រនេស ស្ថិតនៅភូមិរនេស ឃុំពងទឹក ស្រុកដំណាក់ចង្អើរ ខេត្តកែប ដើម្បីអបអរទិវាមច្ឆជាតិ ១កក្កដា និងដើម្បីបង្កើនផលត្រីស្តុកនៅតាមអាងទឹកធម្មជាតិ។ នេះបើតាមការបញ្ជាក់ពីលោក ថឹង បូរិន ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកែប លើកឡើងនាថ្ងៃទី០៤ ខែកក្កដា ឆ្នាំ២០២៥នេះ ក្នុងពិធីអបអរសាទរទិវាមច្ឆជាតិ ១ កក្កដា ឆ្នាំ២០២៥។ ពិធីនេះបានការអញ្ជើញចូលរួមដ៏ខ្ពង់ខ្ពស់ពីសំណាក់ឯកឧត្តមបណ្ឌិត សោម ពិសិដ្ឋ អភិបាលខេត្តកែប និងឯកឧត្ដម លោកជំទាវ សមាជិកក្រុមប្រឹក្សាខេត្ត អភិបាលរងខេត្ត តំណាងសាលាដំបូងខេត្ត ប្រធានមន្ទីរអង្គភាពជុំវិញខេត្ត ថ្នាក់ដឹកនាំ មន្ត្រីរាជការ សាលាស្រុកដំណាក់ចង្អេីរ បងប្អូនប្រជាពលរដ្ឋ និងសិស្សានុសិស្សផងដែរ។ នាឱកាសនោះឯកឧត្តម បណ្ឌិត សោម ពិសិដ្ឋ អភិបាលខេត្តកែប បានថ្លែងការកោតសរសើរការខិតខំរបស់អភិបាលរងទទួលបន្ទុក ថ្នាក់ដឹកនាំនិងមន្រ្តីរាជការនៃមន្ទីរកសិកម្ម រុក្ខាប្រមាញ់ និងនេសាទ ដែលរៀបចំបានយ៉ាងល្អក្នុងការប្រារព្ធនូវពិធីនេះ។ ឯកឧត្តមរំពឹងថា តាមរយៈត្រីមេពូជ និងកូនត្រីដែលយើងលែងនាពេលនេះ និងជួយទៅបន្ថែមបរិមាណត្រីរបស់យើងក្នុងអាងទឹកនេះ ដែលជាប្រយោជន៍សម្រាប់ប្រជាជននៅតំបន់នេះ។ ស្របតាមកំណើនអ្នកទេសចរចូលមកលេងខេត្តកែប បន្តកើនឡើង ម្ហូបអាហារជាតម្រូវការចាំបាច់បំផុត ក្នុងនោះឯកឧត្តម ជំរុញអោយមន្ទីរកសិកម្ម រុក្ខាប្រមាញ់ និងនេសាទខេត្តកែប ត្រូវជំរុញការអភិវឌ្ឍវារីវប្បកម្មឲ្យបានខ្លាំងក្លា ទាំងខ្នាតតូច មធ្យម និងធំ តាមតំបន់ដែលមានសក្តានុពល ទាំងទឹកសាប ទឹកប្រៃ ដើម្បីផ្គត់ផ្គង់តម្រូវការអាហារ ពិសេសសាច់ត្រីជាអាហារសុវត្ថិភាព ក្នុងគោលបំណងកាត់បន្ថយសម្ពាធការចាប់ត្រីពីធម្មជាតិ និងធានាបាននិរន្តរភាពជីវចម្រុះសមស្រប។ ក្រៅពីនោះឯកឧត្តមណែនាំដល់មន្ទីរអង្គភាពពាក់ព័ន្ធទាំងអស់ ពង្រឹងក្នុងការទប់ស្កាត់នូវបទល្មើសនេសាទគ្រប់ប្រភេទទាំងទឹកសាប និងទឹកប្រៃ។ តាមលោកប្រធានមន្ទីរកសិកម្ម រុក្ខាប្រមាញ់ និងនេសាទខេត្តកែប បញ្ជាក់ថា រយៈពេល៦ខែក្នុងឆ្នាំ២០២៥នេះ ប្រជានេសាទខេត្តកែប ប្រមូលផលនេសាទទឹកសាបស្រស់ចំនួន៦៥តោន និងផលនេសាទសមុទ្រស្រស់ចំនួន ២៧៧៧តោន៕
វីដែអូ