រតនគិរី៖ ផ្អែកលើស្មារតីសាមគ្គីភាព និងការយកចិត្តទុកដាក់ចំពោះជីវភាពកងកម្លាំងប្រដាប់អាវុធជាតិ លោកឧត្ដមសេនីយ៍ទោ អ៊ុង សុភាព ស្នងការនគរបាលខេត្តរតនគិរី បានចាត់តាំងកងកម្លាំងឱ្យចុះជួយច្រូតស្រូវជូនគ្រួសារទាហានជួរមុខម្នាក់នៅស្រុកកូនមុំ ខេត្តរតនគិរី បន្ទាប់ពីទទួលបានព័ត៌មានតាមបណ្ដាញសង្គមអំពីការខ្វះខាតកម្លាំងពលកម្ម។
ព័ត៌មានដែលត្រូវបានផ្សព្វផ្សាយតាមបណ្ដាញសង្គមហ្វេសប៊ុកអំពី ទាហាន ជួរមុខ បានរៀបរាប់អំពីទុក្ខលំបាករបស់គ្រួសារទាហានម្នាក់ ដែលត្រូវការជំនួយបន្ទាន់ក្នុងការប្រមូលផលស្រូវ ខណៈដែលភរិយារបស់វីរៈកងទ័ពរូបនោះកំពុងមានផ្ទៃពោះធំជិតដល់ថ្ងៃសម្រាលកូន។
នៅរសៀលថ្ងៃទី ២០ ខែវិច្ឆិកា ឆ្នាំ២០២៥ ភ្លាមៗបន្ទាប់ពីទទួលបានព័ត៌មានដ៏គួរឱ្យអាណិតអាសូរនេះ លោកឧត្ដមសេនីយ៍ទោ អ៊ុង សុភាព បានចាត់តាំងក្រុមការងារ និងកងកម្លាំងនគរបាលក្រោមឱវាទចុះទៅត្រួតពិនិត្យដល់ទីតាំងផ្ទាល់ ដើម្បីធានា និងរៀបចំផែនការជួយច្រូតស្រូវជូនគ្រួសារកងកម្លាំងជួរមុខនោះឱ្យបានរួចរាល់នៅ ថ្ងៃស្អែក (ថ្ងៃទី ២១ ខែវិច្ឆិកា)។
ថ្លែងប្រាប់មហាជន លោកឧត្ដមសេនីយ៍ទោ អ៊ុង សុភាព បានបញ្ជាក់ថា ការសម្រេចចិត្តនេះគឺដើម្បីចូលរួមចំណែកសម្រាលបន្ទុក និងលើកទឹកចិត្តដល់កងកម្លាំងដែលកំពុងបំពេញភារកិច្ចការពារជាតិមាតុភូមិនៅជួរមុខ ព្រមទាំងបង្ហាញពីការគិតគូរខ្ពស់របស់កងកម្លាំងនគរបាលជាតិចំពោះសុខទុក្ខរបស់ប្រជាពលរដ្ឋ ៕