រតនគីរី៖ យោងតាមសេចក្តីរាយការណ៍គួរឲ្យកត់សម្គាល់មួយ បានបង្ហាញថា មានសកម្មភាពល្បែងស៊ីសងខុសច្បាប់ប្រភេទ ជល់មាន់តាមអនឡាញ កំពុងត្រូវបានប្រព្រឹត្តយ៉ាងគំហុកនៅក្នុងភូមិថារងជើង ឃុំអូរជំ ស្រុកអូរជុំ ខេត្តរតនគីរី កាលពីថ្ងៃទី២៥ ខែវិច្ឆិកា ឆ្នាំ២០២៥។ សកម្មភាពល្បែងស៊ីសងដ៏អាណាធិបតេយ្យនេះ គឺជារឿងដែលត្រូវថ្កោលទោស និងចាំបាច់ត្រូវបង្ក្រាបជាបន្ទាន់ ។ព្រោះ ផ្គើនទៅនឹងច្បាប់ស្តីពីការបង្ក្រាបល្បែងស៊ីសង របស់ព្រះរាជាណាចក្រកម្ពុជា ដែលមាត្រា ១ បានចែងយ៉ាងច្បាស់ថា «ត្រូវហាមឃាត់ជាដាច់ខាតការលេងល្បែងស៊ីសងគ្រប់ប្រភេទ នៅគ្រប់ទីកន្លែងទូទាំងព្រះរាជាណាចក្រកម្ពុជា លើកលែងតែបានទទួលការអនុញ្ញាតពីរាជរដ្ឋាភិបាល»។ ល្បែងជល់មាន់តាមអនឡាញនេះ គឺស្ថិតក្នុងប្រភេទល្បែងស៊ីសងដែលត្រូវហាមឃាត់។គឺរំលោភបំពានយ៉ាងធ្ងន់ធ្ងរដល់គោលនយោបាយ «ភូមិ-ឃុំមានសុវត្ថិភាព» ទាំង ៧ ចំណុច ជាពិសេសចំណុចដែលទាក់ទងនឹងការលុបបំបាត់អំពើអនាធិបតេយ្យ និងល្បែងស៊ីសង គ្រប់ប្រភេទ ដើម្បីធានាបាននូវសណ្តាប់ធ្នាប់សាធារណៈ និងសន្តិសុខសង្គមជូនប្រជាពលរដ្ឋ។ មន្ត្រីស្មោះត្រង់ និងពលរដ្ឋស្លូតបូតកំពុងមានក្ដីបារម្ភ ការកើតមាននូវល្បែងស៊ីសងខុសច្បាប់នេះ មិនត្រឹមតែបំផ្លាញសេដ្ឋកិច្ចគ្រួសារ និងសណ្តាប់ធ្នាប់សង្គមប៉ុណ្ណោះទេ ថែមទាំងជាការប្រឆាំងយ៉ាងចំហទៅនឹងការខិតខំប្រឹងប្រែងរបស់រាជរដ្ឋាភិបាលក្នុងការកសាងសង្គមមួយដែលគ្មានអំពើអសីលធម៌។ អាស្រ័យហេតុនេះ ពួកគាត់សូមអំពាវនាវដល់៖ អាជ្ញាធរមានសមត្ថកិច្ច ដូចជា កម្លាំងនគរបាល និងអាវុធហត្ថ ចុះត្រួតពិនិត្យ និងចាត់វិធានការបង្ក្រាបឲ្យបានម៉ឺងម៉ាត់បំផុត ទៅតាមខ្លឹមសារនៃច្បាប់ស្តីពីការបង្ក្រាបល្បែងស៊ីសង ដែលមានចែងនូវទោសប្បញ្ញត្តិទាំងចំពោះអ្នកលេង អ្នកបើកកន្លែងលេង និងអ្នកចាត់ចែង។ ប្រជាពលរដ្ឋ ចូលរួមសហការផ្តល់ព័ត៌មាន និងរាយការណ៍ពីទីតាំងល្បែងស៊ីសងនានា ដើម្បីរួមចំណែកអនុវត្តគោលនយោបាយ «ភូមិ-ឃុំមានសុវត្ថិភាព» ឲ្យបានជោគជ័យ។ មានតែការអនុវត្តច្បាប់ដោយតម្លាភាព និងម៉ឺងម៉ាត់ប៉ុណ្ណោះ ទើបអាចទប់ស្កាត់ និងលុបបំបាត់ល្បែងស៊ីសងខុសច្បាប់គ្រប់ប្រភេទបាន ប្រកបដោយប្រសិទ្ធភាព៕
វីដែអូ