កែប៖ ដើម្បីអោយពិធីបើការដ្ឋានសាងសង់ព្រែកជីកហ្វូណនតេជោ នៅថ្ងៃទី៥ ខែសីហា ឆ្នាំ២០២៤ ខាងមុខនេះ មានភាពអធិកអធម រដ្ឋបាលខេត្តកែប បានត្រៀមរៀបចំកម្មវិធីជាច្រើន ដូចជាការប្រគុំតន្ត្រីនៅតាមតំបន់ឆ្នេរ បាញ់កាំជ្រូច ការដង្ហែក្បួនព្យុហយាត្រា ការតុបតែងលម្អសោភ័ណភាពខេត្ត ជាមួយអ្នកចូលរួមប្រមាណ៣ពាន់នាក់ ជាពិសេសរុះរើស្លាកប៉ាណូស្រាបៀរចេញ ជំនួសវិញដោយរូបភាពគាំទ្រ និងអបអរសាទរគម្រោងព្រែកជីកហ្វូណនតេជោ។ នេះជាប្រសាសន៍លើកឡើងរបស់ ឯកឧត្តមបណ្ឌិត សោម ពិសិដ្ឋ ថ្លែងនៅក្នុងកិច្ចប្រជុំបូកសរុបលទ្ធផលការងារប្រចាំខែកក្ដដា និងលេីកទិសដៅអនុវត្តការងារខែបន្ទាប់ ឆ្នាំ២០២៤ របស់រដ្ឋបាលខេត្តកែប នាព្រឹកថ្ងៃទី២៥ ខែកក្កដា ឆ្នាំ២០២៤នេះ ដោយមានការចូលរួមពីសំណាក់ លោក លោកស្រី អភិបាលរងខេត្ត លោកឧត្ដមសេនីយ៍ វរសេនីយ៍តំណាងកងលាំងទាំងបី ប្រធានមន្ទីរអង្គភាពជុំវិញ អភិបាលក្រុង ស្រុក និងមន្ត្រីរាជចំណុះអោយរដ្ឋបាលខេត្ត។ ឯកឧត្តមបណ្ឌិត សោម ពិសិដ្ឋ បានលើកឡើងថា ខេត្តកែបជាខេត្តមួយក្នុងចំណោមខេត្តបួន ដែលព្រែកជីកហ្វូណន ឆ្លងកាត់ ដូច្នេះ នៅថ្ងៃបើកការដ្ឋានសាងសង់ព្រែកជីកនៅថ្ងៃទី៥ ខែសីហា ខាងមុខនេះ រដ្ឋបាលខេត្តបានត្រៀមរៀបចំកម្មវិធីជាច្រើនដូចជា ការប្រគុំតន្ត្រីនៅតាមតំបន់ឆ្នេរ បាញ់កាំជ្រួច ការដង្ហែក្បួនព្យុហយាត្រា ការតុបតែងលម្អសោភ័ណភាពខេត្តជាដើម ដែលនឹងមានការចូលពីមន្ត្រីរាជការ កងកម្លាំង យុវជន សិស្ស និស្សិត ប្រជាពលរដ្ឋប្រមាណ ៣ពាន់នាក់ ពោលគឺធ្វើយ៉ាងណា ឲ្យកម្មវិធីអបអរសាទរប្រព្រឹត្តិទៅអធិកអធមបំផុត ។ឯកឧត្តមបានបន្តទៀតថា ដើម្បីឲ្យការផ្សព្វផ្សាយបានទូលំទូលាយ រដ្ឋបាលខេត្តបាន នឹងកំពុងបន្តរុះរើស្លាកប៉ាណូ ស្រាបៀរនៅតាមដងផ្លូវសំខាន់ចេញ និងជំនួសវិញដោយស្លាកប៉ាណូគាំទ្រ និងអបអរសាទរ ការបើកការ ដ្ឋានគម្រោង ព្រែកជីកហ្វូណនតេជោ។ ហើយអាជ្ញាធរក្រុងស្រុកត្រូវចុះទៅពិនិត្យ និងចូលរួមអនុវត្តឲ្យបានឆាប់រហ័ស។ ទទ្ទឹមគ្នានោះ ស្រុកដំណាក់ចង្អើរដែលជាស្រុកព្រែកជីហ្វូណនឆ្លងកាត់ ក៏ត្រូវធ្វើកម្មវិធីអបអរសាទរដាច់ដោយឡែកមួយផងដែរនៅឯឆ្នេរអង្កោល ហើយក្បូនព្យុហយាត្រារបស់រដ្ឋបាលខេត្ត នឹងដង្ហែទៅជួបជុំគ្នានៅទីនោះ។ (ប្រសាសន៍អភិបាលខេត្តកែប)បើតាមការបញ្ជាក់របស់ឯកឧត្តមអភិបាលខេត្ត បានបន្តថា ការរៀបចំទង់ជាតិ ទង់ជ្វាលានៅតាមដងផ្លូវសំខាន់ៗ នឹងចាប់ផ្តើមធ្វើនៅថ្ងៃទី១ ខែសីហាខាងមុខ ខណៈដែលនៅតាមទីអារាម មណ្ឌលសាសនាផ្សេងៗ គេហដ្ឋានប្រជាពលរដ្ឋក្នុងខេត្ត ក៏បានត្រៀមឧបករណ៍បន្លឺសំឡេងរួចរាល់ ដើម្បីអបអរសាទរថ្ងៃបើកការដ្ឋានសាងសង់ព្រែកជីកហ្វូណនតេជោផងដែរ៕
វីដែអូ