ខេត្តកែប: នៅព្រឹកថ្ងៃទី១៨ ខែមិថុនា ឆ្នាំ២០២២ លោក ជំទាវ ឌិត នីតា ភរិយា ឯកឧត្តមបណ្ឌិត សាយ សំអាល់ រដ្ឋមន្ត្រីក្រសួងបរិស្ថាន អញ្ជើញចូលរួមដាំដើមកោងកាង ចំនួន៥០០០ដើម នៅតាមបណ្តោយឆ្នេរសមុទ្រខេត្តកែប ដើម្បីអរសាទរ ទិវាបរិស្ថានជាតិ និង បរិស្ថានពិភពលោក ៥មិថុនា ២០២២ ។ អញ្ជើញចូលរួមនៅក្នុងព្រឹត្តការណ៍ដ៏មានសារៈសំខាន់នេះ ក៏មានការអញ្ចេីញចូលរួមជាវត្តមាន លោកជំទាវ ម៉ុម ថានី រដ្ឋលេខាធិការក្រសួបរិស្ថាន ឯកឧត្តមបណ្ឌិត សោម ពិសិដ្ឋ អភិបាល នៃគណៈអភិបាលខេត្តកែប សមាជិក សមាជិកា សមាគមនារីកម្ពុជា ដើម្បីសន្តិភាពនិងការអភិវឌ្ឍក្រសួងបរិស្ថាន លោក លោកស្រី ប្រធាន អនុប្រធានមន្ទីរ អង្គភាព ជុំវិញខេត្ត មន្ត្រីរាជការ និងបងប្អូនប្រជាសហគមន៍នេសាទភូមិថ្មី សង្កាត់ព្រៃធំ ក្រុងកែប ខេត្តកែបជាច្រេីនរយនាក់។ ថ្លែងសុន្ទរកថាស្វាគមក្នុងឱកាសប្រារព្ធទិវាបរិស្ថានជាតិ និងបរិស្ថានពិភពលោក ៥មិថុនា ឆ្នាំ២០២២ នាពេលនោះ ឯកឧត្តមបណ្ឌិត សោម ពិសិដ្ឋ អភិបាល នៃគណៈភិបាលខេត្តកែប បានជំរុញគ្រប់មន្ទីរ វិស័យទាំងអស់ ក៏ដូចជាសាធារណ:ជនទូទៅក្នុងខេត្ត បន្តចូលរួមដាំដើមឈើអោយបានកាន់តែច្រើនថែមទៀត ដើម្បីធានាការពារគុណភាពបរិស្ថាន ឱ្យបានល្អ លើកំពស់សោភណភាពទីក្រុងបៃតង ។ ឯកឧត្តមបញ្ជាក់បន្ថែមថា អាជាធរខេត្ត បាននិងកំពុងយកចិត្តទុកដាក់យ៉ាងខ្លាំងក្នុងកិច្ចគាំពារបរិស្ថាន ការអភិរក្សធនធានធម្មជាតិ សំដៅទប់ស្កាត់ការប្រែប្រួលអាកាសធាតុ ការកើនឡើងកំដៅ ការរាំងស្ងួត ទឹកជំនន់ និងគ្រោះធម្មជាតិផ្សេងៗទៀត ពិសេសធ្វើឱ្យការប្រើប្រាស់ធនធានធម្មជាតិបាននៅស្ថិតថេរ។ មានប្រសាន៍លើកឡើងក្នុងឱកាសនោះ លោក ជំទាវ ឌិត នីតា បានគូសបញ្ជាក់ថា ការប្រារព្ធទិវាបរិស្ថានជាតិ និងបរិស្ថានពិភពលោក ៥មិថុនា ឆ្នាំនេះភ្ជាប់ជាមួយនិង ប្រធានបទ “ថែទាំផែនដី ដើម្បីសុខភាពយើង” ដើម្បីស្វែងរកថាមពលកើតឡើងវិញ បច្ចេកវិទ្យាបៃតង ការកែលំអរគុណភាពខ្យល់ក្នុងទីក្រុង ទីជនបទ នៅទូទាំងពិភាពលោក ពិសេសដើម្បីលើកកំពស់ការយល់ដឹងជាសាធារណៈ អំពីការគ្រប់គ្រង ការប្រើប្រាស់ធានធានធម្មជាតិប្រកបដោយនិរន្តភាព ការប្រយុទ្ធប្រឆាំងការប្រែប្រួលអាកាសធាតុ ការគ្រប់គ្រងគុណភាពបរិស្ថាន លើកំពស់សុខភាពសាធារណៈ និងបំផុសឱ្យមានការចួលរួមឱ្យកាន់តែខ្លាំក្លាថែមទៀត ទាំងស្មារតី សម្ភារៈ ក្នុងការផ្សារភ្ជាប់ទំនាក់ទំនងជាមួយធម្មជាតិ។ សូមបញ្ជាក់ថា ការប្រារព្ធទិវាបរិស្ថានជាតិ និងបរិស្ថានពិភពលោក នាឆ្នាំនេះ ក៏មានការសហការជាមួយក្រុមហ៊ុន ISI ដោយបានចែកជូនអាវយឺតដល់អ្នកចូលរួម និងសហការរៀបចំ សម្រាប់ដំណើរការកម្មវិធី និងរួមគ្នាធ្វើការដាំដើមកោងកាងចំនួន៥០០០ដើមផងដែរ៕
វីដែអូ